Huisgenoot Brief: Groot voete RE: Ina se Brief

Liewe Ina

Ek antwoord op jou brief laas week (Groot Voete).

Ek is nou 26 en dra tussen ʼn 9 en 10 grootte skoen. Ek onthou hoe ek ook hoog en laag moes soek vir skoene vir al die groot hoërskool mylpale. My ma moes deurskiet Worcester toe en met winkelassistente praat terwyl ek skaam-skaam in die hoekie van die skoenwinkel vertoef.

Ek het twee pare skoene vir matriekafskeid gehad, want nie een het eintlik perfek gepas nie.

En, op ʼn stadium het ek net tekkies gedra.

Wel, hier is ʼn paar plekkies waar ek deesdae skoene kry. Hoewel, nou nie mooi dun silwer skoene nie.

Woolworths dra wel ʼn nommer 9, maar dit is soms so ʼn  dun skoen, dat dit nie vir my pas nie. Veral nie die toe skoene nie. En, hul groot nommers vlieg van die rakke af. Wanneer gaan winkel leer dat daar meer mense is wat groot nommers dra?

Ek vind ook dat die kwaliteit van die skoen nie goed is nie. Mens is seker nie veronderstel om daardie skoene 24 uur ʼn dag te dra nie, maar as dit al is wat pas het mens nie ʼn ander keuse nie.

Crocs verkoop ook groter skoene. En, hulle skoene is baie mooi deesdae. Ek dra hulle nommer 11, so ek skat jou dogter sal dalk ʼn nommer 10 by hulle dra.

Crocs is gemaklik, maar wel ʼn bietjie duur. Maar, moet nie dat die naam jou afsit nie. Hulle het pragtige fyn sandale.

Laastens, in Hermanus is daar ʼn winkel met die naam Ally Shoes. Hulle het ook groter nommers. Dit is wel ook ʼn bietjie duurder, maar baie goeie kwaliteit.

Op die stadium is ek gelukkig met ʼn netjiese swart skoen, maar ek skat dit is die laaste ding wat jou dogter soek vir matriekafskeid.

Ek was baie skaam oor my groot voete op skool, totdat een van my klasmaats eendag vir my gesê het, “Weet jy, jy sou darem vreemd gelyk het met klein voete. Dit sou nie by jou pas nie.”

Ek het klaar vrede gemaak dat ek eendag in ʼn Croc gaan trou of kaalvoet op die strand. Net nie in netjiese swart skoene nie.

Sterkte.

Dayne “Grootvoet”Nel